飲奶，食鈣片，食魚油丸……只要可以令到小朋友生高啲，各種方法家長都一定試，因為對於每位爸爸媽媽嚟講，佢地最怕既就係小朋友生得矮，比人笑係「矮仔／矮妹」。特別係現今社交媒體興起既年代，外貌成為咗好多人衡量人價值既標準。可惜嘅係亞洲人又偏偏係最矮人種，所以香港既父母都十分擔心子女嘅身高問題。

普遍家長會嘗試嘅方法有幾種：

第一樣就係食療，家長會提供唔同既保健品比小朋友食，由牛奶，鈣片，到魚油丸甚至田七等中成藥都會派上用場。

第二樣就係運動，唔少家長都會有「打得籃球就會高」嘅諗法，所以會報唔同嘅運動班俾小朋友參加。

第三樣，就係確保小朋友有充足嘅睡眠。

可以做嘅已經做晒，咁究竟仲有啲咩可以注意呢？「人和」可以做既做齊，「地利」改變唔到，「天時」就係要注意嘅野喇！究竟幾時先係小朋友身體發展嘅重要階段呢？

除咗學習有黃金期，原來小朋友嘅生長都有黃金期，分別就係學前期（４至６歲），突增期（１０至１６歲)，同埋衝刺期（男：１７至２５歲，女：１６至２３歲)。只要把握好呢３個成長期，小朋友就可以生高啲！

1. 學前期（４至６歲）

學前期嘅小朋友要多攝取鈣、各類維他命以及其它生長必需嘅礦物質，例如鋅等等嘅微量元素。因為呢段時期就係小朋友「蓄彈藥」嘅重要時期，小朋友吸收足夠且均衡嘅營養，先可以喺之後嘅時間快速而有效咁成長。

鈣攝取量：至少1000毫克（約4盒牛奶嘅鈣量）

2. 突增期（１０至１６歲)

突增期小朋友進入青春期，身體會不斷分泌生長激素，即係普通人口中嘅「發育」階段。除咗要維持充足嘅營養，更重要嘅係充足而優質嘅睡眠，因為生長激素會喺休息嘅時間分泌出嚟，如果欠缺休息時間或者睡眠質素差，生長激素分泌可能會受影響。

鈣攝取量：至少1300毫克（約5盒牛奶嘅鈣量）

3. 衝刺期（男：１７至２５歲，女：１６至２３歲)

青少年喺呢段時期大部份已經發展完成，相較以往身高大致上唔會好大變化，但係其實大部份人嘅生長板尚未完全閉合，只要配合適當嘅策略，每年都仲有2-3厘米嘅生長空間。只要維持以往良好嘅生活習慣，有充足嘅睡眠、均衡飲食、運動習慣，就有繼續增高嘅機會。

鈣攝取量：至少1300毫克（約5盒牛奶嘅鈣量）

小朋友有乳糖不耐症，食唔到奶類製品咁點算啊？

除咗牛奶之外，其實仲有好多食物都有充足嘅鈣，令小朋友可以有更多嘅營養選擇，例如蠔和魚等海鮮類食物、豆腐或大豆等豆類製品、羽衣甘藍或莧菜等深綠色蔬菜，都可以作為良好嘅鈣質攝取源頭。

更多推薦文章：【君子好健康】運動好處多多！把握黃金期叫小朋友做運動啦！