新年拆完利是，相信小朋友嘅「豬仔」錢罌都多咗錢，亦都因為咁，小朋友好多時就會有好多嘢想買。

有家長就同我哋分享，佢嘅仔仔同佢講想用利是錢去換遊戲入面嘅貨幣，等佢可以買限定版嘅武器，喺遊戲入面做最勁嗰個！見到小朋友竟然將啲錢用喺虛擬世界嘅嘢上面，爸爸當然係唔準佢咁做啦，而仔仔都因為咁而嬲咗爸爸，所以呢位爸爸想問小君子有咩方法令小朋友明白「想要」同「需要」，以下係我哋嘅建議。

我哋建議家長可以先從「想要」同「需要」嘅定義進行解釋，再利用例子同埋實踐理財概念去令小朋友對所學嘅概念同定義更加深刻。

「想要」：「想要」嘅嘢通常都係非必要嘅，對我哋而家嘅生活無太大嘅影響，即使我哋如果買唔到佢哋的話，最多都係心情唔好啫

「需要」：「需要」嘅嘢因為係我哋生活嘅必需品，所以如果無咗佢哋嘅話會影響到我哋嘅生活質素，例如係我哋嘅健康。

家長可以用小朋友嘅嘢令佢哋可以簡單咁知道咩叫「需要」，例如家長可以拎走小朋友嘅禦寒衫同埋玩具，先問小朋友想要返邊個，然後再問佢哋冇咗邊一個會對佢嘅影響比較大，最後叫佢哋淨係揀一個，透過呢個例子，相信小朋友會明白咩係「需要」、「想要」之外，亦明白當資源有限嘅時候，應該以「需要」為先。

家長不妨帶小朋友將屋企無用嘅拎去捐贈，喺捐贈嘅過程入面，家長可以同小朋友講解呢個世界上有好多人都無佢哋咁幸福，當小朋友親身體驗過自己「身在福中不知福」嘅時候，就會知道自己要好好珍惜而家擁有嘅嘢

另外，家長也要以身作則，因為小朋友嘅習慣好多時都係由屋企人學返嚟，所以家長自己消費嘅時候要記得節制啲，咁樣小朋友先會聽你講理財㗎～

家長先要小朋友記錄低自己一個星期嘅洗費，然後再叫小朋友解釋返消費嘅原因，如果你覺得小朋友已經分辨到咩係「想要」同「需要」，家長可以獎勵吓佢哋；相反嘅話，家長就可能要再詳細啲解釋多次，又或者可以減少佢哋嘅零用錢，如果佢哋用零用錢亂買「想要」嘅嘢，就會買唔到「需要」嘅嘢，無咗生活必需品當然會辛苦，辛苦完就會知道錢係有限嘅，所以唔可以亂買「想要」嘅嘢。

而家嘅小朋友如果用講道理嘅方式嚟教嘅話，佢哋未必會聽，反而要用互動有趣嘅方式教導佢哋，佢哋會更加容易吸收。家長可以畀小朋友做下工作紙，除咗可以畀家長知道小朋友係咪真係識理財概念之外，亦都可以俾小朋友溫故知新。小君子會喺Facebook派有關理財嘅工作紙，讓小朋友可以用一個輕鬆嘅方式去完全掌握理財嘅概念。